“Berbera Hantida Way Dhashaa, Laakiin Lama Galiyo Ee Waxay U Tagtaa Madaxtooyadda Iyo Nacablayaasha”Dr Gaboose
Hargeysa (TVSLE) Sept 9,2012 - Guddoomiyaha urur siyaasadeedka UMADDA Dr Maxamed Cabdi Gaboose ayaa ka hadlay dib u dhaca Magaalo Madaxda gobolka Saaxil ee Berbera, waxaanu sheegay in hantida ka soo baxda la geeyo aqalka Madaxtooyadda Somaliland. Dr Gaboose, waxa uu sheegay in hantida Berbera taala ee ay ka mid yihiin kaluunka Badda ku jira, haamaha shidaalka, buuraha Sibidhka iyo Madaarka diyaaradaha Berbera marka ay dadku arkaan ay ku qiimayn karaan reer Berbera inay yihiin kuwo ugu hodansan shacabka Somaliland, balse marka Magaaladda la dhex maro uu ka muuqanayo dib u dhac baaxad leh. Guddoomiyaha UMADDA oo ka hadlayay xaflad ururkiisu ku soo bandhigayey 18 Musharax ayaa sheegay in hantida Berbera ka soo baxda la geeyo aqalka Madaxtooyadda isla-markaana ay cunaan kuwa uu ugu yeeshay beenaalayaal. Dr Gaboose oo arimahaa ka hadlayaana waxa uu yidhi “Qofka wax qiimeeyaa marka uu eego Berbera, hantida taala sida badda, xeebta iyo nimcada kale ee Kaluunku ugu soo horeeyo, buuraha sibdihka, dekeda, haamaha, madaarka, waxa uu is odhanayaa reer Berbera waa kuwo ugu hodansan umadda Somaliland, haddana markaad dhex marto Magaaladda, dib u dhaca ka muuqdaa waa mid baaxad weyn, waxaad dareemaysaa in nasiib daro baaxad lihi meesha taallo. Dr Gaboose waxa kale oo uu soo qaaday “Berbera way dhashaa hantida, laakiin lama galiyo ee waa la dhaafiyaa, xagay tagtaa, Madaxtooyadda ayay tagtaa, waxay hantidiinu u tagtaa inta u nacablaysa (Madaxwaynaha), beenaalayaasha ayay u tagtaa”ayuu yidhi waxaanu intaa ku daray “Hantidu Berbera way dhaaftaa iyadda oo dadwaynuhu eegayaan”
|